العريس
_حسن ابن طنط مفيدة شافك وعايز ييجي يتقدم.
_شافني!
ميشوفش وحش والله.
_والله!!
ما تتلمي يا بت.
_هو أنا قولت حاجة
بعدين هو حسن دا أتجوزه ويجبرني أسمي ابني علي علشان يبقا أبو علي اسم على مسمى !
_وأنت تبقي أم علي ونحلي بيك.
_خفة دمك بتقفلني
أهو علشان كلام ولاد أخواتك دول يا ماما مش موافقة.
_يا بت وافقي بقا علشان نلبس فساتين.
_مين قال لكم إن فرحي هيبقى فيه فساتين.
_أومال هنلبس فيه ايه
_عبايات سمرا.
_هموت ورب الكعبة هتجلطني بنت بطني.
_يا خالتو المفروض تكوني بقيتي متعودة بقا.
_صح والله دي لو وافقت ممكن حد فينا يجرى له حاجة.
_شاطرين يا عيال أجاملكم يوم فرحكم إن شاء الله.
_قومي يا بت أنت وهي من هنا قوموا غوروا من وشي.
_ماما مش عارفة أجبها لك إزاي بس حضرتك ال في أوضتي.
حدفتنا بالشبشب وخرجت وهي بتقول كلام عاجزين عن تفسيره والله.
كل دا علشان برفض عرسان زي الفل!
ما هو لو ابن أخوها بيفهم كان جه إتقدم لي وكان زمان معانا كتكوت صغير دلوقت
فالح بس وإحنا صغيرين يقعد يقول لي إنه هيتجوزني وإني هبقا مراته.. ووقت ما إتخرج كان جهز حاجة سفره وسافر وسابني قاعدة هنا ببكي على الأطلال.
_روحتي فين يا جميلة الجميلات.
_ما أنا قاعدة معاكم أهو.
_يعني مش بتفكري في حد كدا ولا حد كدا
_أنت يا بت مش خطيبك جاي النهاردة
إيه ال مقعدك هنا
_أهو أنت قولتي خطيبي مش زوجي!
قبل ما ييجي بربع ساعة هبقا أطلع أغسل وألبس.
_بت يا غزل أنت لسة مكملة في حوار الخطوبة الشرعية دي.
_هو ليه يا ورد يا حبيبتي محسساني إنها عاملة جمعية يعني!
بعدين هي صح وبتعمل ال ربنا أمرها بيه.
وإن شاء الله ربنا يبارك
كنت قريت جملة إمبارح فيما معناها إن على قد طاعتك لربنا في فترة الخطوبة على قد رضا ربنا وكرمه ليك بعد الزواج.
_أنا بس يا آية بستغرب يعني مش كل الناس بتعمل كدا.. يعني معظم صحابي بالنسبة لهم الخطوبة دي كإنهم متجوزين وبيحصل فيها تجاوزات كتير.
_الله يعفو عنا ويهديهم يارب.
كل دا قلة وعي بالدين
الشيخ أمير منيرالله يرضى عنه كان بيقول للشباب هتتخطبوا زي المتجوزين يبقى متزعلوش لما تتجوزوا زي المطلقين.
يمكن ورد معاها حق فعلا الشيء الصح السليم ال يرضي ربنا.. بقا نسبة ال بيقوموا بيه تكاد لا تذكر إحنا في غفلة والله وربنا يلطف بينا حقيقي.
كملنا كلام سوا لحد ما غزل قامت طلعت تجهز وقعدت أذاكر ل ورد شوية.
غزل أكبر مني بسنة وأنا أكبر من ورد ب ٣ سنين. بس من صغرنا وإحنا دايما سوا زي الأخوات.
وأحسن حاجة عملها جدو إنه خلانا كلنا في عمارة واحدة.
_آية كفاية مذاكرة وقومي نعمل حاجة تانية.
_مستقبلك ال هيبكي في الزاوية دا يا غالية طيب.
_مستقبل مين يا آية صلي على النبي كلنا عارفين إن مستقبل المرأة في بيت زوجها.
_اللهم صل على سيدنا محمد والله معاك حق
بس ييجي زوجها المهزأ.
_هييجي.. هييجي والله ولو بعد حين.
ليه ييجي بعد حين لما ممكن ييجي بكرة!
إتنهدت وأخدتها ونزلنا تحت عند جدو وقولنا نعمل كيك ونسلي نفسنا على ما غزل خطيبها يمشي وتنزل.
كانت خالتو وماما تحت مع جدو وبابا وعمو أكرم زوج خالتو بيصلوا المغرب وخالو كمال كان مع طنط نبيلة وغزل في شقتهم.
باليل كنا إتجمعنا كلنا سوا وقعدنا مع بعض.
_إمتحاناتك إمتى يا آية
_طب أنت فاضل لك السنة دي وتخلصي إنما أنا لسة قدامي سنين.
_عينك يا ورد شيليها من حياتي لو
مجبتش إمتياز أمي هتطردني روحي إحسدي
وفاضية.
_فاضية
على أساس إن مش كلها كام أسبوع وأبقا ربة منزل وهتهان.
_يارب أتهان زي إھانتها كدا يارب.
_الواد غيث بيرن.
_كنسلي عليه يا ماما ونرن على اللاب أحسن علشان نشوفه ونكلمه كلنا.
هو حاسس بيا وبدعوتي ولا إيه ابن نبيلة دا!
طلعت غزل بسرعة تجيب اللاب علشان يكلموه
طلعت وراها بس دخلت شقتنا كل مرة بهرب منهم وقت ما بيكلموه علشان عيوني متفضحنيش.
معرفش بيسأل عليا ولا نساني بس أتمنى يكون بيلاحظ غيابي.
قومت إتوضيت وصليت العشا ودعيت ربنا يريح قلبي بعدها دخلت البالكونة أقعد فيها وأنا ببص للسما والنجوم بعد شوية حسيت بلمسة على كتفي.
_طلعتي وسيبتيهم ليه
_علشان متقعديش لوحدك.
_عادي يعني يا غزل أصلا كنت بصلي العشا ولسة داخلة البالكونة.
_عارفة
كتير بنكون شايفين الأمور من وجهة نظرنا ومش راضيين عنها بس في الواقع بتكون عكس كدا تماما أصل ربنا رحيم مستحيل يوجع قلوبنا.
إحنا ال تفكيرنا أوقات بيوجعنا.
_أنا خاېفة يا غزل.
خاېفة أكون غلط وربنا يعاقبني ببعده عني.
_إحكي يا آية إحكي ال في قلبك.
_معرفش أنا نفسي معرفش ال في قلبي.
يوم بقعد أفكر في أخوك وبحس إن من كتر شوقي ليه إني عايزة أرن عليه وأشبع عيوني منه ويوم بفكر وأقول إنه حر وممكن يكون شايفني أخته وإن كلام زمان كان مجرد هزار ولعب عيال وأوقات بحس إن حرام عليا تفكيري فيه كدا.
وخاېفة من كتر رفضي لأي عريس يمر بيا العمر وأفضل كدا بس برجع أقول إني هفضل مستنياه.
أنا متلخبطة يا غزل متلخبطة ودماغي فيها دوشة كتير بالله عليك طمنيني وقولي لي إن ربنا هجبر بخاطري.
_إهدي يا عيوني إهدي.
حاولي تغلبي أنت أفكارك وتقللي صراعاتك إشغلي وقتك كله بحاجات تانية وتكون مفيدة
وإتأكدي يا آية إتأكدي إن لو مكتوب لكم نصيب سوا محدش هيقدر يمنعكم سلمي أمورك لله وخلي عندك يقين بإن كل حاجة بتحصل لنا ف هي خير لينا.
الله يراضي قلبك يا حبيبتي يارب.
_يارب يا غزل يارب.
ولو حبي ليه شړ يشيله من قلبي.
_بتحضنوا بعض من غيري!!
والله أنتم خاينين.
_إحنا مش خاينين.. إحنا شعرنا شاب من الخضة.
مش تخبطي أو تدي أي إنذار يا بت
_أنتم ال مش مركزين.
وأنت يا ست آية فقرة النكد والبكاء على الأطلال بتاعتك خلصت ولا لسة
_أنت مالك خليكي في حالك يا ثانوية عامة.. خلي غيري يذاكر لك كيميا بقا.
_هروح لمرات أخويا حبيبتي ياختي تديني.
_بالسلامة والقلب داعي لك.
_معلش مقدرة حالتك ف مش هعاتبك.
_بس يا بت أنت وهي إيه.. مفيش إعتبار لوجودي وسطكم
_إتنيلي يا غزل هو أنت علشان بعد أسابيع هتتجوزي هتعملي نفسك عاقلة بقا!
_والله يا بت يا ورد أنت فعلا عايزة تتربي قومي إنزلي ذاكري بقا.
_لاء أنا هبات مع آية النهاردة.
_ودا ليه إن شاء الله
_مزاجي بيت خالتي وأنا حرة فيه.
بعدين إحنا إخوات يا خالو قصدي يا آية هاا.
_يا قليلة الرباية!
_يا قليلة الحيا! شايفة يا غزل شايفة بتلقح عليا إزاي.
_هو أنا جيبت حاجة من عندي ما الواد كان هنا وكنتم هتتخطبوا.. تقومي تقولي لخالك أنكم أخوات!! فيه غباء كدا! كسرتي بخاطر الواد.
_بعيد عن إني هقوم أجيبك من شعرك دلوقتي بس أنا وقتها كنت صغيرة وكنت متوترة والكلمة خرجت ڠصب عني أنتم ال مسكتم فيها بقا.
يلا لعله خير.
_خلاص يا آية قولنا إننا هنصبر ونحاول وننسى.
وأنت يا ست ورد.. نتلم شوية علشان محدفكيش
_العنف
الأسري في أبهى صورة.
حضنتها وغزل حضنتنا إحنا الإتنين إتنهدت وأنا بفكر في كلام غزل وإني
