سكريبت بقلم ايمان محمود

_بقى أنا يتعملي بلوك والله لأوريك يا يونس يا ابن أم يونس
احلفي بالله انه عملك بلوك!
بغيظ والله عملي بلوك أنا غلطانة إني دخلت أكلمه أصلا
يا بت اصبري بس هو محاولش يكلمك تاني
بصتلها بغيظ وسكت شوية ضميت ايديا الاتنين جامد وبغيظ.
كلمني يختي لقيت الأفندي راح عمل جروب حطني أنا وهو فيه.
قاطعتني طب ما الراجل فل أهو وعداه العيب
كملت ومعانا بابا
ايه
وباباه
هو بيهزر
نفخت لا يا ستي بيقول كدا هيبقى أحسن كملت بتريقة عشان قال ايه الشات دا يعتبر خلوة وبتاع
ضحكت هو مكلكعها أوي ولا أنا بس اللي حساه أوڤر
مردتش عليها ونفخت قال خلوة قال فيها ايه يعني لو اتكلمنا واتس! مش كفاية مش بيرضى يتكلم معايا في التليفون إلا لو كان بابا أو ماما جنبنا أنا مش فاهمة بصراحة إيه الراجل الغريب دا!
شيمو يابت
انتبهت

ها ايه يا فاطمة
كنت بقولك بعد الحوار دا قلتيله على الخروجة بتاعة بكرا
لا بصراحة انطفيت وقمت قافلة خالص
بغيظ طب وهتخرجي معايا ازاي يا فالحة!
مش عارفة هشوف بابا الاول وأبقى أأكد عليكي بالليل لو هاجي معاكي
هزت راسها بماشي وأنا رجعت سرحت من تاني اااه منك يا يونس يا تاعب قلبي وياك منكرش إني معجبة بيه وبشخصيته اللطيفة بس كلاكيعه دي مخلياني مش عارفة أتعامل معاه يونس على حسب استنتاجاتي اللي استنتجتها لحد دلوقتي راجل حنين عارف ربنا كويس وبيحب يراعي ربنا في كل تصرفاته بس أنا حساه مزودها معايا شوية! قصدي. أنا خطيبتك يا جدع صباح الفل! .
_ابقي قولي ليونس انك هتخرجي يا شيماء اوعي تنسي
بغيظ حاضر يا بابا
ضحك وشاولي أقربله هو عارف إني متغاظة من تصرفات يونس جدا وعارف إن مش دي فترة الخطوبة اللي كنت بحلم بيها وكنت دوشاهم بيها قعدت جنبه فطبطب عليا وبدأ يتكلم بهدوء.
_بابتسامة يونس راجل كويس يا شيماء واللي بيعمله دا عشان هو خايف عليكي هو مش عايزكوا تغضبوا ربنا فبيحاول يتقي الله فيكي عشان ربنا يباركلكوا في حياتكوا لو كملتوا سوا
بغيظ بس أنا خطيبته يا بابا دا. دا مش بيرضى يمسك ايدي حتى هو أنا صاحبته
_ضحك وعشان خطيبته لازم يبقى حذر معاكي انتي فاكرة انكوا لو قضتوها زي ما انتي بتحلمي وبتشوفي كدا ربنا هيباركلكم في حياتكم بعدين انتي فاكرة ان الناس اللي مقضياها دي ربنا مباركلهم في حياتهم محدش عارف ايه اللي بيحصل جوا البيوت يا شيماء ولا حد عارف الناس دي عايشة مع بعض ازاي ولا ايه اللي بيحصل بينهم يا بنتي وهما أكيد مش هيفرجوا الناس على مشاكلهم وبعدين ياللي عايزة ايدك تتمسك انتي انتي تعرفي انه حرام يلمسك أصلا عشان انتي لسة أجنبية عنه وعن حكم مس المخطوبة والخلوة بها قال الزيلعي رحمه الله ولا يجوز له أن يمس وجهها ولا كفيها وإن أمن الشهوة لوجود الحرمة وانعدام الضرورة يعني ملهوش انه يلمسك ولا يختلي بيكي لمجرد انه خطيبك يا شيمو أنا عارف إن حوار الجروب اللي عمله ودخلنا فيه دا صدمك لإنه صدمني أنا شخصيا بس صدقيني. الحركة دي خلته يعلى في نظري أوي وخلتني أتأكد إني هدي بنتي لواحد هيعرف يصونها ويرعاها كويس
رميت نفسي في حضنه من غير كلام وهو ضمني وطبطب عليا ما هو. ممكن يكون اللي بيعمله هو الصح فعلا! .
بقلمي ايمان محمود.
أنا هخرج مع صحابي
محتاجة حاجة
لا شكرا
طب خدي بالك من نفسك وبلاش ضحك وهزار في الشارع بصوت عالي
حاضر
وخدي بالك من التكاتك عشان حوارات الخطف